Ёшларни ҳарбий-амалий спорт мусобақаларига кенг жалб этиш, ҳарбий ва психологик тайёргарликка эга, буюк аждодларимиз каби мард, жасур, ҳалол, жисмонан бақувват, билимли, ватанпарвар, қийин ва экстремал вазиятларда тўғри ҳаракатланиш кўникмаларини эгаллаган баркамол авлод этиб тарбиялаш мақсадида 2021-йилдан мамлакатимизда Ўзбекистон Республикаси мудофаа вазири кубоги учун “Ватанпарварлар” ҳарбий-спорт мусобақалари ўтказилиши йўлга қўйилган.

Бугун Бойсун туманидаги Алпомиш марказий ўйингоҳида тумандаги умумтаълим мактабларининг 10-11-синф ўқувчилари ўртасида “Ватанпарварлар” ҳарбий спрот мусобақаларининг туман босқичи ўтказилди.

Ушбу мусобақада туман ҳокимлиги, мудофаа ишлари бўлими, мактабгача ва мактаб таълими бўлими, Фавқулодда вазиятлар бўлими болалар ва ўсмирлар спорт мактаби, ҳамда умумтаълим мактабларининг 10-11- синф ўқувчилари иштирок этишди.

Мамлакатимизнинг барча ҳудудларини қамраб, уч босқичда ўтказилаётган “Ватанпарварлар” ҳарбий-спорт мусобақалари интеллектуал билим, юксак жисмоний тайёргарлик, бой тажриба ва кўникмаларга эга бўлган ҳарбий хизматчиларнинг янги авлодини тарбиялашга қаратилган бўлиб, унда ўқувчи-ёшлар мусобақа низомига мувофиқ “Сафда қўшиқ айтиш”, “Темур тузуклари”, “Моҳир мерган”, “Ҳарбийлаштирилган эстафета”, “Жабрланувчига биринчи ёрдам кўрсатиш” шартлари бўйича ўзаро беллашадилар.

Мусобақа якунида ғолибларга Мудофаа ишлари бўлими томонидан диплом ва эсдалик совғалари топширилди.