Президентимизнинг 2023-йил 16-17-ноябр кунлари Сурхондарё вилоятига ташрифида воҳаликларнинг кўп йиллик муаммоларидан бири – Бойсундан Деновгача бўлган "Дарбанд-Бойсун-Элбаён" автомобил йўлини замонавий лойиҳалар асосида реконструксия қилиш топшириғи берилган эди. Умумий қиймати 147,6 млн доллар бўлган мазкур йўлнинг 111 километр қисми тўлиқ реконструксия қилинаётган бўлиб, лойиҳа пудратчиси "Ланкаран йўл Тикинти" МЧЖ ҳисобланади.

Бугун Сурхондарё вилояти ҳокими Улуғбек Қосимов мазкур лойиҳа доирасида амалга оширилаётган ишлар билан танишди. Реконструксия ишлари белгиланган режа-графикдан ортда қолаётганлиги, ишлар суст кетаётганлиги учун эътироз билдирилди. Масъулларга пудратчи билан ҳамкорликда ишларни жадаллаштириш чорасини кўриш, муаммоли масалаларни ҳал этиш юзасидан вазифалар топширилди.

Шундан сўнг, Бойсун тумани марказида 24/7 режимда фаолият юритувчи туризм кўчаси ва "Ёшлар боғи"ни ташкил этиш лойиҳалари тақдимоти ҳамда "Янги Ўзбекистон" массивида турар жойлар қурилиши билан танишилди. Вилоят раҳбари лойиҳаларни сифатли амалга ошириш, массивда барпо этилган турар жойлар атрофини ободонлаштириш, инфратузилма билан таъминлаш вазифаларини белгилаб берди.

Ташриф якунида вилоят қурилиш соҳасида амалга оширилаётган ишлар ҳамда мажмуа ташкилотлари фаолияти таҳлил қилиниб, йўл қўйилган камчиликлар кўрсатиб ўтилди ҳамда келгусидаги вазифалар белгилаб олинди.