Инсон табиатида иллатларнинг мавжудлиги жамият учун зарар келтиради. Бу иллатлар бора-бора одатга, табиийликка айналиб қолади ва кишини жиноят сари етаклайди.

Шундай иллатлардан бири бу ўғриликдир. Й.Н. ўғриликни ўзига одат қилиб олди. Муқаддам ушбу турдаги жиноятни содир этганликда айбдор деб топилиб, жазо ўтаб чиқган бўлса-да, ўзига тегишли хулоса чиқармади.

2024-йилнинг сентябр ойида ўзи вақтинча яшаб келаётган хонадон эгасининг уйда йўқлигидан фойдаланиб, уй эгасига тегишли бўлган пул маблағларини яширин равишда талон-тарож қилиб хавфли ретсидив жиноятни содир этди.

Жиноят ишлари бўйича Бойсун туман судининг биносида очиқ суд мажлиси бўлиб ўтди.

Суд, судланувчининг мазкур жиноят содир этганликдаги айби, ўзининг айбига иқрорлик билдириб берган кўрсатувларидан ташқари, жабрланувчининг кўрсатувлари, ишда мавжуд бўлган ҳодиса содир бўлган жойни кўздан кечириш ҳақидаги баённома ва унга илова қилинган фотосуратлар жабрланувчи тақдим қилган дискни эшитиш ва стенограмма қилиш ҳақидаги баённома ва унга илова қилинган диск, гумон қилинувчининг кўрсатувларини ҳодиса содир бўлган жойда текшириш ҳақидаги баённома ҳамда суд жараёнида текширилган бошқа далиллар мажмуи билан тўлиқ ўз исботини топди деб ҳисоблади.

Судланувчи Й.Н Ўзбекистон Республикаси ЖК 169-моддаси 3-қисмининг “а” банди билан айбли деб топилиб, Ўзбекистон Республикаси ЖК 169-моддаси 3-қисмининг “а” банди билан ЖКнинг 57-моддасини қўллаб, 3 (уч) йил муддатга озодликдан маҳрум қилиш жазоси тайинланди.

Ҳа, жиноятга албатта жазо муқарар! Зеро, жазо маҳкумни ахлоқан тузатиш, унинг жиноий фаолиятни давом эттиришига тўсқинлик қилиш ҳамда маҳкум, шунингдек бошқа шахслар янги жиноят содир этишининг олдини олишдан иборатдир.

Жиноят ишлари бўйича Бойсун туман судининг раиси

А.Рахматов.